И.Я. Яковлев çуралнăранпа 175 çул çитнине халалласа К.В. Иванов ячĕллĕ Чăваш патшалăх академи драма театрĕ „Театр – ачасене“ вĕренÿ акцийĕ ирттерет. Паян, ака уйăхĕн 20-мĕшĕнче, 8-мĕш тата 10-мĕш класра вĕренекенсем Иоким Максимов-Кошкинский пьеси тăрăх лартнă „Вĕри юнлă çемçе чун. Константин Иванов” спектакле кайса курчĕç. Драма ачасен чунне тыткăнларĕ. Куç умне И.Я. Яковлев, К.В. Иванов, Федор Павлов, Чĕмпĕр чăваш шкулĕнче вĕреннĕ ытти паллă çынсен сăнарĕсем, ун чухнехи пурнăç чĕррĕн тухса тăчĕç. Самана йывăррине пăхмасăр çамрăксем вĕренесшĕн çуннă, ăслă çын пулас тесе тăрăшнă; савăнма, шÿтлеме, юрлама-ташлама та маттур пулнă. Вĕсем халăхăн çутă пуласлăхĕ пирки ĕмĕтленнĕ. Ĕмĕчĕсем пурнăçланма мĕн чул пултаруллă чăваш вăй хунă! Пирĕн вара мĕн пуррине çухатас марччĕ, упраса, малалла аталантарасчĕ.